O X Foro Territorios Patrimonio propón unha nova mirada sobre os territorios rurais como espazos vivos, capaces de conservar o seu patrimonio ao tempo que afrontan os desafíos do presente e do futuro.

Ao longo da xornada, o Foro Territorios Patrimonio reunirá administracións, profesionais, empresas, investigadores e proxectos de referencia para reflexionar sobre cuestións clave como o futuro dos patrimonios rurais, a comunicación responsable dos territorios, o equilibrio entre conservación e desenvolvemento, ou o papel que desempeñan as iniciativas locais na construción dun modelo sostible.

Nesta edición, a atención centrarase tamén en experiencias que forman parte da realidade da Ribeira Sacra, desde a convivencia entre a paisaxe cultural e as infraestruturas hidráulicas ata proxectos que demostran como o territorio pode xerar innovación, actividade económica e novas oportunidades sen perder a súa identidade.

Nun momento especialmente significativo para a Ribeira Sacra, inmersa na recta final da súa candidatura a Patrimonio Mundial da UNESCO, o Foro quere tamén poñer en valor o camiño percorrido ao longo destes anos. Máis aló da resolución, este encontro reivindica a importancia de seguir preservando o patrimonio e o territorio rural como un compromiso colectivo e de longo percorrido.

Como en edicións anteriores, o Foro estenderá o debate ao propio territorio cunha visita ao Encoro de Belesar e a unha adega da Ribeira Sacra, dous espazos que exemplifican o equilibrio entre patrimonio, paisaxe, aproveitamento dos recursos e actividade vitivinícola.

O X Foro Territorios Patrimonio propón así un espazo de reflexión sobre como construír territorios capaces de preservar o seu patrimonio, impulsar novas oportunidades e manter o equilibrio entre identidade, desenvolvemento e futuro.